Vatnsleki hjá Mercedes og Vettel aftur fljótastur

Sebastian Vettel var aftur fljótastur í Jerez á æfingum fyrir komandi tímabil í Formúlu 1. Vatnsleki stöðvaði Mercedes og McLaren átti annan erfiðan dag.

Vettel var rúmlega einni og hálfri sekúndu hraðari í dag en í gær. Hann ók 87 hringi og var tæplega sekúndu fljótari en næsti maður, Felipe Nasr á Sauber.

Mercedes hætti snemma í dag eftir að vatnsleki kom upp í W06. Heimsmeistarinn, Lewis Hamilton náði samt að aka 91 hring sem var meira en nokkur annar gerði í dag.

Daniil Kvyat gerði afdrifarík mistök í dag. Hann komst í snertingu við varnarvegg og braut eina framvænginn sem Red Bull kom með til Jerez. Liðið mun fljúga nýjum framvæng til Jerez.

Lítið sást til McLaren í dag. Jenson Button ók sex hringi og setti tíma sem var rúmlega hálfri mínútu hægari en tími Vettel. Honda vélin er enn að glíma við byrjunarörðuleika.

Lotus bíllinn komst til Jerez og á brautina í dag. Pastor Maldonado var undir stýri og ók 41 hring og setti tíma sem var 5 sekúndum hægari en tími Vettel. Fyrir Lotus eru það gríðarlegar framfarir ef miðað er við fyrstu æfingarnar í fyrra, sem liðið sleppti alveg. Þegar liðið mætti loks til æfinga í fyrra var bíllinn annað hvort stopp á brautinni eða lokaður inni í bílskúr. Lotus gegnur greinilega betur með nýju Mercedes vélina heldur en Renault vél síðasta árs.