Sverrir óttast ekki umræðu í tengslum við Islam

Talið er nær öruggt að mennirnir þrír sem skutu tólf til bana í Frakklandi í dag hafi framið árásina í nafni Íslam. Ibrahim Sverrir Agnarsson, formaður Félags múslima á Íslandi, fordæmir árásina en óttast að hún verði notuð gegn múslimum öllum verði það staðfest að um múslima hafi verið að ræða.

„Ég fordæmi öll morð og hryðjuverk og sérstaklega þau sem framin eru af geðsjúklingum í nafni Islam,“ segir Sverrir í samtali við Vísi.

Franska þjóðin er í áfalli eftir árásina en hún er sú mannskæðasta þar í landi í nærri tvo áratugi. Þrír hettuklæddir menn, vopnaðir hríðskotabyssum, ruddust inn á ritstjórnarskrifstofur satírublaðsins Charlie Hebdo og hófu skothríð með þeim afleiðingum að tólf létust og fimm særðust. Tímaritið hefur á undanförnum árum birt fjölmargar skopmyndir af Múhameð spámanni og leiðtoga ISIS samtakanna, en talið er að árásin tengist þeim myndbirtingum.

En, hver er afstaða Félags íslenskra múslima til satíru á borð við þá sem verið er að mótmæla með svo ofsafengnum hætti í París.

„Mín skoðun á því sem þú kallar „satíru“ er að ég leiði það hjá mér og styð tjáningarfrelsið skilyrðislaust. Annars finnst mér satíra ekki rétt hugtak yfir til dæmis teikningar JP [Jyllands Posten], þær eru hreinn hatursboðskapur. En það sama gildir um hann, allir vel menntaðir nútíma múslimar fordæma árásir vegna orða eða skopteikninga,“ segir Sverrir.

Óttastu að þetta muni hafa neikvæð áhrif á umræðuna hér á landi, hvað varðar stöðu múslima -- þá sérstaklega í tengslum við umræðu um moskubyggingu í Reykjavík?

„Ég óttast enga umræðu í tengslum við Islam en auðvitað verður þessi árás notuð gegn okkur ef í ljós kemur að það hafi verið múslimar að verki í París. Ég afskrifa eiginlega ISIS í þessu samhengi, þeir eru yfirleitt fljótir að lýsa og básúna út sín illvirki,“ segir hann.

Kennsl voru borin á ódæðismennina þrjá fyrr í kvöld. Allir eru þeir franskir ríkisborgarar, tveir þeirra eru bræður 32 og 34 ára og sá þriðji er átján ára. Einn þeirra hefur verið dæmdur, meðal annars fyrir að hafa reynt að smygla vígamönnum til Írak. Gríðarlegur viðbúnaður er í París og var hæsta viðbúnaðarstigi vegna hryðjuverkaárása lýst yfir í  kvöld.