Fljótastur í þúsund þrista

Stephen Curry, leikmaður Golden State Warriors, fer á kostum í NBA-deildinni og er einn besti skotmaður í sögu deildarinnar.

Hann á fjölda meta yfir þriggja stiga skot í deildinni og hefur nú verið fljótastur í sögu deildarinnar að skora eitt þúsund þriggja stiga körfur.

Fyrir leikinn gegn Indiana í nótt var Curry með 999 þrista í 368 leikjum. Hann sló svo metið í nótt og bætti met Dennis Scott um 88 leiki.

Næsta spurning er hvort Curry geti slegið met Ray Allen yfir flestar þriggja stiga körfur í sögu deildarinnar.

Hann skoraði 2.937 þriggja stiga körfur á sínum ferli sem er kannski ekki lokið. Þeim áfanga náði Allen í 1.300 leikjum.

Curry er 27 ára gamall og á eftir að taka mörg þriggja stiga skot áður en hann leggur skóna á hilluna.