Gunnar: Kann að meta stuðning Svíanna

„Mér líður yfirleitt eins og ég hafi aldrei verið í betra formi og það er svolítið sérstakt núna því mér finnst eins og ég hafi tekið stórt stökk sem gerist yfirleitt ekki. Mér líður þannig og svo kemur í ljós á laugardaginn hvernig það kemur út,“ segir Gunnar Nelson ákaflega yfirvegaður að vanda.

Það var hreinlega slegist um að fá hann í viðtöl á miðvikudag og hann rúllaði sér auðveldlega í gegnum það þó svo dagurinn hafi verið langur hjá honum.

Búinn í úlnliðnum

„Þessi dagur er undirlagður af viðtölum. Ég er svo alveg búinn í úlnliðnum eftir að hafa skrifað á einhver 300 plaköt. Þetta er hluti af starfinu og ég er orðinn vanur þessu,“ segir Gunnar og brosir blíðlega.

Andstæðingur hans að þessu sinni er Bandaríkjamaðurinn Rick Story. Reynslumikill kappi sem hefur meðal annars lagt meistarann í veltivigtinni, Johny Hendricks. Hann hefur þó ekki átt neitt sérstaklega góðu gengi að fagna síðustu misseri. Í heildina hefur hann unnið sautján bardaga og tapað átta.

„Það er sama plan og alltaf hjá mér. Ég fer þarna inn og þá kemur þetta allt í ljós. Ég reyni að bregðast við andstæðingnum og vera vakandi. Ég er búinn að vinna vinnuna í líkamsræktarsalnum og þá leyfir maður skrokknum að ráða þessu og vera tilbúinn,“ segir Gunnar en flestir búast við frekar öruggum sigri okkar manns. Það yrði nokkurt áfall ef hann tapaði. Sem fyrr hefur Gunnar fulla trú á sjálfum sér.

Spennandi að mæta Story

„Mér líður alltaf eins fyrir bardaga. Það er spennandi og virkilega krefjandi að fara inn í búrið gegn nýjum andstæðingi sama hvort hann er verri eða betri en einhver annar. Þá er þetta nýr einstaklingur sem hreyfir sig á annan hátt. Það verður spennandi að fara á móti Story.“

Story vill helst hafa bardagann sem lengstan en Gunnar segir það alls ekki vera verra. Hann geti tekið margar lotur og verði betri með hverri lotunni.

„Ég er rétt byrjaður að hitna í þriðju lotu,“ segir Gunnar og glottir en hann er nú í fyrsta skipti í bardaga sem er fimm lotur en áður hefur hann tekið þátt í þriggja lotu bardögum. Það hefur reyndar engu breytt þar sem hann klárar andstæðinga sína afar snemma.

Aðalnúmer kvöldsins

Gunnar er aðalnúmer kvöldsins. Maðurinn sem á að selja miða í Globen. Það hefur gengið vel og Gunnar segir Svíana taka honum vel.

„Við eigum augljóslega ýmislegt sameiginlegt með Svíum. Ég hef fengið gríðarlega góðar móttökur hérna og Svíarnir líta á mann sem bróður. Ég finn það alveg. Það er líka svipuð stemning og heima að æfa með þeim. Ég kann að meta þann stuðning sem ég fæ frá Svíunum.“