Loksins sól

Hitinn í gær komst upp í tæpar 20 gráður á höfuðborgarsvæðinu um klukkan sex í gær og var það mesti hiti sem mælst hefur í sumar. Margir nýttu daginn í útiveru, kaffihúsaferð eða sund.

„Það er búið að vera mjög mikið að gera. Það er gott veður og allir glaðir og hressir,“ segir Þórunn Jörgensen, sem vinnur á Kaffi París. Hún segir að það sé vinsælt að panta sér nachos og bjór á svona góðviðrisdögum.

„Annars er það mikið matur og kaffi,“ segir hún. Í dag spáir björtu veðri og litlu minni hita en í gær, góðviðrið heldur áfram í höfuðborginni á miðvikudag en þá spáir léttskýjuðu.