Sony kennir nafninu um hrakfarir myndarinnar

Kvikmyndin Sex Tape var frumsýnd á Íslandi í gær en í henni leika Jason Segel og Cameron Diaz hjón sem hafa verið gift í áratug og eiga tvö börn. Þau ákveða að gera kynlífsmyndband til að blása smá lífi í hjónabandið en það endar með ósköpum.

Jay, karakter Jasons, deilir óvart myndbandinu með öllum sem þau þekkja, og jafnvel fólki sem þau þekkja ekki og reyna hjónin allt til að fjarlægja myndbandið af netinu.

Myndin hefur ekki fengið góða dóma gagnrýnenda og þénaði aðeins fimmtán milljónir dollara um frumsýningarhelgina í Bandaríkjunum, tæpa tvo milljarða króna. Er þetta ein versta frumsýningarhelgi myndar með Cameron Diaz í aðalhlutverki en myndin kostaði um fjörutíu milljónir dollara í framleiðslu, um fjóra og hálfan milljarð króna. 

Myndin er framleidd af Sony Pictures og segir Rory Bruer hjá fyrirtækinu að titill myndarinnar gæti hafa sett strik í reikninginn. 

„Við gerðum sæta, fyndna, rómantíska gamanmynd með stjörnum sem við elskum en titillinn er ruglandi fyrir suma,“ segir hann í viðtali við Hollywood Reporter. 

Myndin var í fjórða sæti yfir aðsóknarmestu myndirnar á frumsýningarhelginni. Í fyrsta sæti var Dawn of the Planet of the Apes, í öðru The Purge: Anarchy og í því þriðja var fjölskyldumyndin Planes: Fire and Rescue.

Lenti í kynlífsmyndbandaskandal

Rob Lowe fer með eitt af aukahlutverkunum í Sex Tape en hann lenti sjálfur í kynlífsmyndbandaskandal árið 1989, eins og margar stjörnur hafa lent í.

Myndband af honum að stunda kynlíf með tveimur konum lak til fjölmiðla en önnur konan var sextán ára og hin 22 ára. Var myndbandið tekið upp kvöldið fyrir fund demókrata en á þessum tíma var Rob dyggur stuðningsmaður Michaels Dukakis.

Þá lak annað myndband einnig á netið. Þar sást Rob með vini sínum, Justin Moritt, stunda kynlíf og munnmök með bandarískri fyrirsætu að nafni Jennifer í hótelherbergi í París. Sú upptaka var ein af fyrstu kynlífsmyndböndunum sem voru seld á opnum markaði og skartaði stjörnu í „aðalhlutverki“. Ímynd Robs bauð hnekki en innan nokkurra ára náði hann að bæta hana og gerði meira að segja grín að þessu öllu saman í skemmtiþættinum Saturday Night Live.