Talsverð ísingarhætta á blautum vegum

Í kvöld kólnar aftur um vestanvert landið og má jafnvel búast við slydduéljum í kvöld. Eftir miðnætti kólnar enn frekar og er þá ísingarhætta talsverð á blautum vegum.

Töluverð hálka er nú á höfuðborgarsvæðinu en hringvegurinn er auður frá Reykjavík allt austur að Vík. Mikil úrkoma var í allan dag í Reykjavík og búast mátti því við mikilli hálku þegar líða fer á kvöldið og fram í nóttina.

Hálka eða hálkublettir eru þó víða á öðrum vegum á Suðurlandi, jafnvel flughált á köflum.

Vegir hafa verið mikið auðir á Vesturlandi en nú er krapi á Fróðárheiði og hálka bæði á Bröttubrekku og Holtavörðuheiði.

Á Vestfjörðum er sumstaðar krapi eða hálka á fjallvegum en mikið autt á láglendi.

Á Norðurlandi er Hringveginum mikið til auður en hálka er á útvegum. Hálka er við Mývatn og á köflum þaðan austur yfir Mývatns og Möðrudalsöræfi.

Enn er flughált á fáeinum sveitavegum á Austurlandi en annars er víða hálka eða hálkublettir á aðalleiðum bæði á Austur- og Suðausturlandi. Nokkuð hefur borið á grjóthruni í skriðunum.