Kobe Bryant alveg að ná Jordan

Hinn 36 ára gamli Kobe Bryant skoraði 32 stig í sigri Los Angeles Lakers á Sacramento Kings í nótt og vantar nú "aðeins" 30 stig til að jafna Michael Jordan.

Kobe Bryant er stigahæsti leikmaður NBA-deildarinnar á þessu tímabili með 25,5 stig að meðaltali í leik. Hann hefur skorað 562 stig í 22 leikjum og er þar með kominn með 32262 stig á ferlinum í NBA.

Michael Jordan skoraði á sínum tíma 32292 stig í 1072 leikjum (30,1 að meðaltali í leik) og vantar Kobe því bara 30 stig til að jafna átrúnaðagoðið sitt og um leið 31 stig til að komast upp fyrir MJ og í 3. sætið á listanum.

Kobe Bryant á þó ekki mikla möguleika í að ná stigameti Kareem Abdul-Jabbar sem heur enn 6125 stiga forskot á hann.

Næsti leikur Los Angeles Lakers er á móti San Antonio Spurs á föstudaginn og tveimur dögum síðar heimsækir liðið Minnesota Timberwolves. Það er mjög líklegt að Kobe nái Jordan í öðrum af þessum tveimur leikjum Lakers.

Það má búast við að margir fylgist með til að verða vitna af þessari stóru stund fyrir Kobe Bryant sem á enn eftir að vinna einn meistaratitil til að ná titlafjölda Jordan.

Flest stig í sögu NBA-deildarinnar:

1.     Kareem Abdul-Jabbar     38387

2.     Karl Malone     36928

3.     Michael Jordan     32292

4.     Kobe Bryant     32262

5.     Wilt Chamberlain     31419

6.     Shaquille O'Neal     28596

7.     Moses Malone     27409

8.     Elvin Hayes     27313

9.     Dirk Nowitzki     27169

10.     Hakeem Olajuwon     26946