Hálka víðast hvar

Enn er afar hvasst víða á landinu og er stormviðvörun í gildi á austanverðu landinu. Snjókoma eða él, en úrkomulítið sunnanlands. Heldur hægara og styttir að mestu upp vestantil þegar líður á daginn. Dregur úr vindi og ofankomu í kvöld og nótt. Norðan 8-15 og él austantil í fyrramálið en fremur hæg breytileg átt og skýjað með köflum um landið vestanvert. Gengur í suðaustan og síðar vestan 8-13 með snjókomu vestantil seinni partinn á morgun, en dregur úr vindi og styttir að mestu upp fyrir austan. Kólnandi veður. Frost 2 til 3 stig á morgun, kaldast inn til landsins.

Færð og aðstæður

Hálka eða snjóþekja er á flestum vegum á Suðurlandi og við Faxaflóa er óveður mjög víða. Hálka og skafrenningur er á Mosfells og Lyngdalsheiði.

Ófært er um Holtavörðuheiði, Bröttubrekku, Svínadal en þæfingsfærð um Laxárdalsheiði. þungfært og skafrenningur um Fróðárheiði annars er hálka eða snjóþekja á Vesturlandi og víða er stórhríð.

Á Vestfjörðum og Norðurlandi vestra er stórhríð og ekkert ferðaveður. Á Vestfjörðum er búið að opna um Mikladal og Hálfdán þar er hálka og skafrenningur. Súðavíkurhlíð er lokuð vegna snjóflóðahættu og verður staðan metin aftur á morgun 11. des. Lokað er til Flateyrar vegna snjóflóðs, einnig er staðan metin aftur á morgun 11. des.

Á Norðurlandi vestra er lokað á Þverárfjalli og Vatnsskarði.

Lokað er á milli Dalvíkur og Ólafsfjarðar. Þæfingur er á Öxnadalsheiði. Lokað er um Víkurskarð.  Á Eyjafjarðarsvæðinu er snjóþekja og snjókoma en austan við Víkurskarð er hálka, snjóþekja og éljagangur. Þæfingsfærð í Oddskarði og skafrenningur. Hálka og éljagangur er víða á Austurlandi.