Loksins vann Philadelphia leik | Myndbönd

Philadelphia 76ers vann sinn fyrsta leik á tímabilinu í NBA-deildinni er liðið hafði betur gegn Minnesota Timberwolves á útivelli, 85-77.

Liðið hafði tapað fyrstu sautján leikjum sínum á tímabilinu en aðeins eitt lið hefur byrjað verr í sögu deildarinnar. Það var New Jersey Nets árið 2009 er liðið tapaði fyrstu átján leikjunum sínum það tímabilið.

Sigurinn var þó allt annað en fallegur. Skotnýting liðsins var einungis 39 prósent og tapaðir boltar voru alls nítján. Philadelphia skoraði þá aðeins níu stig í öðrum leikhluta.

En Minnesota tapaði boltanum jafnoft og var með enn verri skotnýtingu en Philadelphia sem tókst að landa sigrinum og var því vel fagnað í leikslok. Michael-Carter Williams var stigahæstur með 20 stig en hann var með níu fráköst og níu stoðsendingar þar að auki.

Gorgui Dieng skoraði fimmtán stig fyrir Minnesota og tók sextán fráköst.

Boston vann Detroit, 109-102, í framlengdum leik þar sem Jeff Green skoraði 32 stig, þar af átta í röð í framlengingunni.

Boston hafði tapað síðustu fimm leikjum á undan og var því sigurinn kærkominn. Þetta var hins vegar tíunda tap Detroit í röð.

Brooklyn vann San Antonio, 95-93, einnig í framlengdum leik. Kevin Garnett var ekki með Nets en Mirza Teletovic skora-ði 26 stig og tók fimmtán fráköst í fjarveru hans.

Brooklyn missti niður fjórtán stiga forystu á síðustu fimm mínútum venjulegs leiktíma en náði undirtökunum að nýju í framlengingunni.

Danny Green skoraði 20 stig fyrir San Antonio og tók tíu fráköst þar að auki.

Houston vann Memphis, 105-96, þrátt fyrir að hafa verið án þriggja byrjunarliðsmanna. James Harden skoraði 21 stig fyrir liðið og þeir Trevor Ariza og Jason Terry sextán hvor.

Memphis hafði unnið fimm leiki í röð og skoraði fyrstu átta stigin í leiknum en þá tóku heimamenn yfir. Þeir létu forystuna ekki af hendi eftir fyrsta leikhluta.

Úrslit næturinnar:

Charlotte - Chicago 95-102

Washington - LA Lakers 111-95

Boston - Detroit 109-102

Brooklyn - San Antonio 95-93

Miami - Atlanta 102-112

Houston - Memphis 105-96

Milwaukee - Dallas 105-107

Minnesota - Philadelphia 77-85

Utah - Toronto 104-123

LA Clippers - Orlando 114-86