Vara við ágjöf og brimróti

Mikilli ölduhæð er spáð undan Vestfjörðum annað kvöld og aðfararnótt miðvikudagsins 10. desember. Samkvæmt spám getur ölduhæð orðið yfir tólf metrar af norðan og norðnorðaustan.

Í tilkynningu frá Veðurstofu Íslands segir að rétt sé að vera sérstaklega á varðbergi yfir áhrifum af ágjöf og brimróti. Sjávarstaða verður há í ljósi sjávarfallshæðar og talverðs áhlaðanda.

Viðbragðsaðilum á Vesturlandi og Vestfjörðum er ráðlagt að fylgjast vel með aðstæðum. Einnig er þeim ráðlagt að vera undirbúnir því að greiða úr vandræðum sem af þessu geta hlotist.