Landsnet í viðbragðsstöðu vegna veðurútlits

Unnið er eftir viðbragðsáætlun hjá Landsneti vegna veðurútlits á vestanverðu landinu í dag. Samkvæmt spám er hætta á seltu og krapa með aftakaveðri, sem eykur líkur á truflunum í flutningskerfinu með hættu á straumleysi.

Samkvæmt tilkynningu frá fyrirtækinu eru mestar líkur á truflunum þar sem veðrið verður verst á vestanverðu landinu. Þó er ekki hægt að útiloka truflanir víðar um landið.

„Allir vinnuflokkar Landsnets eru í viðbragðsstöðu og í undirbúningi er að manna helstu tengivirki á vestan- og norðanverðu landinu. Landsnet undirbýr einnig aðrar ráðstafanir, svo sem að jafna orkuflutning milli landshluta og lækka spennu til að draga úr líkum á yfirslætti í tengivirkjum og minnka þannig afleiðingar hugsanlegra truflana.“

Viðbragðsáætlanir Landsnets eru viðamiklar vegna ástands flutningskerfisins, en flutningskerfi rafmagns, að Suðvesturhluta landsins undanskildu, er takmörkunum háð og tenging milli landsvæða um byggðalínu er mjög veik.