Fréttamaður Sky Sports: Árangur Íslands hefur komið mér á óvart

Gary Cotterill, fréttamaður Sky Sports, segir að vináttulandsleikur Íslands gegn Belgíu í kvöld verði áhugaverð viðureign.

„Skyndilega eru allir meðvitaðir um Ísland eftir sigurinn á Hollandi og stöðu liðsins í undankeppni EM,“ sagði hann í viðtalinu sem má sjá í heild sinni hér fyrir ofan.

„En þetta er áhugaverður leikur fyrir Belga líka. Þeir þurftu sterkan andstæðing til að undirbúa liðið sitt fyrir leikinn gegn Wales á sunnudag,“ bætti hann við en í þeirri viðureign verður toppsæti B-riðils í húfi.

Hann segir að Sky Sports fylgist reglulega með gengi belgíska landsliðsins. „Aðallega vegna þess að margir í landsliði Belga leika með liðum í ensku úrvalsdeildinni. En það verður einnig áhugavert að fylgjast með íslenska liðinu.“

Cotterill segir að gengi Íslands í haust hafi komið honum á óvart. „Ég kom til Íslands fyrir þremur árum til að sjá U-21 liðið spila gegn Englandi. Þá var lítið sem benti til þess að þetta væri í vændum.“