Náðu í börn látins liðsfélaga svo þau gætu verið með á gullmyndinni

Í fagnaðarlátunum strax eftir spennandi 2-1 sigur Bandaríkjanna á Kanada í framlengingu í úrslitaleik Vetrarólympíuleikanna á sunnudag skautuðu Auston Matthews, Zach Werenski og Matthew Tkachuk um svellið með treyju númer þrettán, sem tilheyrði Johnny Gaudreau heitnum. 

Þegar bandaríska liðið stillti sér upp fyrir myndatöku fengu leikmennirnir börn Gaudreaus, þau Noa og Johnny Jr., með sér á svellið í hópinn.

Við erum augljóslega að hugsa til hans

„Að geta klárað þetta svona, að vinna, að hafa treyjuna hans með á liðsmyndinni, að fá börnin hans út á svellið með okkur, við erum augljóslega að hugsa til hans,“ sagði Auston Matthews, fyrirliði bandaríska liðsins.

„Það var bara eins og áhrifin sem hann hafði á svo marga stráka í þessu herbergi væru sérstök. Hann var með okkur í anda allt mótið,“ sagði Matthews.

Jeppi ók á þá í hjólreiðatúr

Gaudreau, þá 31 árs, og yngri bróðir hans, Matthew, þá 29 ára, létust árið 2024 þegar jeppi ók á þá þar sem þeir voru á reiðhjólum. Johnny Gaudreau hefði verið líklegur kandídat í þetta ólympíulið, sérstaklega eftir skuldbindingu hans við bandaríska landsliðið með þátttöku á heimsmeistaramótinu vorið áður en hann lést.

Hann var ástsæll liðsfélagi og hæfileikaríkur leikstjórnandi sem var með næstum stig að meðaltali í leik á ferli sínum sem spannaði 763 leiki.

Bandaríska liðið hengdi treyju Gaudreaus upp í búningsklefa sínum fyrir hvern leik á Ólympíumótinu til að heiðra minningu hans, hefð sem þeir tóku upp frá 4 Nations Face-Off mótinu í fyrra.

Ekkja Johnny Gaudreaus, Meredith, var í stúkunni á úrslitaleiknum ásamt foreldrum hans, Guy og Jane.

Vildu fá alla fjölskylduna með

„Við sáum þau þarna uppi og við vildum fá alla fjölskylduna með en það var svolítið erfitt með hliðið, svo við ákváðum að ná í börnin. Það var sérstök stund að sjá Guy og Jane,“ sagði Werenski, sem var einn af liðsfélögum Gaudreaus hjá Columbus Blue Jackets.

Gaudreau-bræðurnir voru liðsfélagar í íshokkí í Boston College og nánir vinir nokkurra leikmanna í núverandi liði.

Nokkrir bandarískir leikmenn töluðu um að hafa fundið fyrir nærveru Gaudreau-bræðranna á meðan á Ólympíuleikunum stóð.

„Johnny og Matty ættu að vera hér“

„Johnny og Matty ættu að vera hér, og það er stærsti missirinn sem við öll hjá USA Hockey, fjölskylda þeirra, okkar fjölskylda, höfum gengið í gegnum. Og að hafa Johnny Jr. og Noa þarna úti, það fannst mér bara rétt,“ sagði Larkin.

„Og ég held að hluti af því að pökkurinn fór ekki í netið hjá okkur hafi verið að hann stóð þar einhvern veginn og gerði eitthvað, hlæjandi með Matty. Einhvern veginn lögðu þeir álög á netið okkar svo pökkurinn fór ekki inn.“

Larkin grínaðist meira að segja með Gaudreau með breitt bros á vör.

„Það er kaldhæðnislegt varðandi varnarleikinn, hann hefði aldrei verið þarna aftur,“ sagði Larkin og hló. „En við söknum hans og elskum hann og við elskum fjölskyldu hans,“ sagði Larkin.