Heimir: Mér flaug í hug að hætta við leikinn gegn Belgíu

Heimir Hallgrímsson, annar landsliðsþjálfara Íslands, er ánægður með undirbúning íslenska landsliðsins í vikunni þrátt fyrir að vináttuleikurinn gegn Belgíu á miðvikudag hafi tekið einbeitinguna aðeins frá leiknum mikilvæga gegn Tékklandi hér ytra á morgun.

„Fyrirfram var leikurinn gegn Belgíu örlítil truflun en það spilaðist vel úr því og í dag erum við ánægðir með að hafa tekið þennan leik,“ sagði Heimir en viðtalið má sjá í heild sinni hér fyrir ofan.

Leikurinn gegn Belgíu var skipulagður með nokkrum fyrirvara og Heimir neitar því ekki að sú hugsun hafi komið upp að betra væri að sleppa leiknum þegar í ljós kom hversu mikilvægur viðureignin gegn Tékkum yrði, enda bæði liðin enn taplaus í A-riðli undankeppni EM 2016.

„Auðvitað kom það upp í hugann en á endanum voru kostirnir fleiri en gallarnir,“ segir Heimir og játar því að Tékkar hafi haft ákveðið forskot með því eyða vikunni saman á æfingum.

„Það er alltaf gott að taka langan undirbúning og skipuleggja sig vel fyrir svona leiki, enda gefst oft lítill tími til slíks hjá landsliðum. Við sáum að þegar við spiluðum við Tyrkland í upphafi keppninnar hversu mikilvægt það var fyrir okkur að eyða vikunni saman.“

Hann segir að leikmenn séu einbeittir leikinn gegn Tékkum og að hugarfarið sé í góðu lagi. Það hafi einnig komið í ljós gegn Belgíu.

„Menn vissu til hvers var ætlast af þeim. Þeir vita alveg hvað þeir eru að fara að gera í þessum leik og ég held að þeir séu mjög einbeittir fyrir þennan leik.“

„Þetta er ákaflega mikilvægur leikur og tap í Tékklandi yrði engin skömm. Sumir segja að jafntefli væru góð úrslit en við förum í hann með því hugarfari að vinna hann og koma okkur í góða stöðu í riðlinum.“

Heimir segir að liðin séu áþekk á margan hátt, bæði vel skipulögð og spili öflugan varnarleik. „Ef ég væri sérfræðingur myndi ég spá honum 0-0. Ég gerði það nú oft fyrir leikina á HM í sumar og fékk það allt aftur í andlitið. Maður veit því aldrei hvernig svona leikir muni fara.“

„En miðað við liðin hafa spilað þá eru þau bæði afar skipulögð og ég held að það verði erfitt að fá fyrsta markið í leikinn. En maður veit aldrei hvernig hann þróast eftir að það kemur.“

„Við höfum ekki lagt áherslu á neina sérstaka leikmenn í þeirra liði. Við vitum í hverju þeirra styrkleikar liggja og við erum með það í huga að stöðva fremur ákveðin hlaup og sóknaraðgerðir fremur en einhvern sérstakan leikmann.“