Charley Hoffman hlutskarpastur í Mexíkó

Bandaríkjamaðurinn Charley Hoffman sigraði í gær á sínu þriðja móti á PGA-mótaröðinni en hann lék best allra á OHL Classic sem fram fór í Mexíkó.

Hoffman var meðal efstu manna fyrir lokahringinn á El Camaleon vellinum sem hann lék á 66 höggum eða fimm undir pari og endaði samtals á 17 höggum undir pari. Það var nóg til þess að tryggja honum sigur en landi hans, Shawn Stefani, endaði einn í öðru sæti á 16 höggum undir.

Hinn ungi Danny Lee frá Nýja-Sjálandi nagar sig eflaust í handabökin en hann var í forystu á lokahringnum eftir níu holur þar sem hann hafði fengið sjö fugla í röð á ótrúlegan hátt. Honum tókst þó ekki að fylgja því eftir á seinni níu holunum þar sem að hann fékk þrjá skolla og þurfti því að sætta sig við þriðja sætið á 15 höggum undir pari samtals.

OHL Classic er síðasta opinbera mótið á PGA-mótaröðinni á árinu en í næstu viku fer fram lokamót Evrópumótaraðarinnar í Dubai þar sem margir af bestu kylfingum heims verða í eldlínunni.