Þjálfari Hjálmars náði "bara" silfrinu og var rekinn

Mikael Stahre var látinn taka pokann sinn hjá sænska úrvalsdeildarliðinu IFK Gautaborg í morgun en hann hefur þjálfað Hjálmar Jónsson og félaga undanfarin þrjú tímabil.

Mats Gren, yfirmaður íþróttamála, segir að félagið þurfti nýjan leiðtoga nú þegar það er að fara í enduruppbyggingu.

„Undanfarna sex mánuði hefur elítuumhverfi félagsins verið krufið til mergjar. Við teljum að þessi beyting muni skila sér bæði til skemmri og lengri tíma," sagði Mats Gren í fréttatilkynningu frá IFK Gautaborg.

IFK Gautaborg fékk silfrið á þessu tímabili en liðið endaði sex stigum á eftir meistuum Malmö FF. Liðin töpuðu jafnmörgum leikjum (4) en Malmö FF vann hinsvegar þrjá fleiri leiki en Gautaborgarliðið.

„Það má þó ekki líta framhjá því að Mikael Stahre hefur unnið frábært starf hjá félaginu. Þriðja sæti, annað sætið og sænskur bikarmeistaratitill árið 2013 eru allt árangur sem talar sínu máli. Á sama tíma eru framundan stórar breytingar á rekstri félagsins og við teljum þetta rétta tímapunktinn fyrir nýjan þjálfara," sagði Mats Gren.

Mikael Stahre kom til IFK Gautaborgar árið 2012 en þrátt fyrir ungan aldur (39 ára) hafði hann áður bæði þjálfað AIK og gríska liðið Panionios. Nýr þjálfari IFK Gautaborgar verður kynntur seinna í þessum mánuði.