Efnilegasti fótboltamaður í heimi heldur með Liverpool

Norðmaðurinn Martin Ödegaard er efnilegasti fótboltamaður heims samkvæmt samantekt breska vefmiðilsins Teamtalk.

Teamtalk setti saman topp fimmtíu lista yfir mestu „undrabörn" fótboltans í dag en efstur og yngstur á listanum er hinn fimmtán ára gamli leikmaður Stromsgodset.

Barcelona heldur áfram að unga út stjörnum og tveir leikmenn unglingaliða félagsins eru á listanum þar á meðal Króatinn Alen Halilovic sem er í 2. sæti.

Martin Ödegaard spilaði á dögunum sinn fyrsta A-landsleik fyrir Noreg en hann er mikill stuðningsmaður Liverpool þótt að það sé nú ólíklegt að Liverpool hafi betur í baráttunni um kappann enda löngu kominn á radarinn hjá Real Madrid og Manchester United.

Ödegaard bætti á dögunum 31 árs gamalt met Sigurðar Jónssonar (16 ára og 251 dags gamall á móti Möltu 1983) þegar Martin kom inná sem varamaður á móti Búlgaríu en hann varð þar með yngsti leikmaður í undankeppni EM frá upphafi eða aðeins 15 ára og 300 daga.

Martin Ödegaard hefur spilað 22 leiki með Stromsgodset í norsku úrvalsdeildinni á þessu tímabili og er með 5 mörk og 6 stoðsendingar í þeim.



Tíu efnilegustu fótboltamenn heims samkvæmt Teamtalk:

1. Martin Ödegaard, 15 ára (Stromsgodset):

2. Alen Halilovic, 18 (Barcelona):

3. Gabriel Barbosa, 18 (Santos):

4. Hachim Mastour, 16 (AC Milan):

5. Riechedly Bazoer, 18 (Ajax):

6. Mosquito, 18 (Atletico Paranaense):

7. Youri Tielemans, 17 (Anderlecht):

8. Neal Maupay, 18 (Nice)

9. Ruben Neves, 17 (Porto):

10. Seung-Woo Lee, 16 (Barcelona):