Russell Henley tekur forystuna á McGladrey Classic

Bandaríkjamaðurinn ungi, Russell Henley, leiðir á McGladrey Classic mótinu sem fram fer núna um helgina en hann er á 9 höggum undir pari eftir fyrstu tvo hringina.

Henley lék stórkostlegt golf á Seaside vellinum í gær og kom inn 63 höggum eða sjö undir pari en hann einpúttaði tíu flatir á hringnum.

Brian Harman, Andrew Svoboda og Brendon De Jonge deila öðru sætinu á átta höggum undir pari.

Sigurvegari síðasta árs, Chris Kirk, er í góðum málum á fimm höggum undir pari ásamt mörgum öðrum kylfingum en margir eru um hituna og yfir 20 kylfingar á innan við fjórum frá forystunni.

Þriðji hringur fer fram í dag en bein útsending verður á Golfstöðinni frá klukkan 18:00.