Landsliðshópur Letta lemstraður

Margir fastamenn með lettneska landsliðinu eru frá vegna meiðsla og þá eru margir af lykilmönnum þess í lítilli sem engri leikæfingu.

Þetta segir Ilvars Koscinkevičs, blaðamaður hjá Sporta Avize tímaritinu í samtali við Vísi. „Við söknum leikmanna í nánast öllum stöðum á vellinum,“ sagði hann um ástandið á lettneska landsliðshópnum.

Fyrstan ber að nefna markvörðinn Andris Vaņins sem leikur með Sion í Sviss. Hann er ekki í hópnum nú og kemur það því í hlut hins 39 ára gamla Aleksandrs Koļinko að verja markið á föstudag.

„Hann hefur haldið hreinu í síðustu leikjum og spilaði virkilega vel í vináttuleiknum gegn Armeníu (2-0 sigur í byrjun september),“ segir Ilvars en Koļinko var aðalmarkvörður Lettlands þegar liðið komst í úrslitakeppni EM 2004.

Meðal annarra sem eru frá vegna meiðsla má nefna vinstri bakvörðinn Vitālijs Maksimenko, sem spilar með VVV Venlo í Hollandi, og miðjumennina Artis Lazdiņš, Alans Siņeļņikovs og Oļegs Laizāns. Þá er sóknarmaðurinn Edgars Gauračs ekki í hópnum þar sem hann er nýbúinn að jafna sig á sínum meiðslum.

En helst sakna Lettar hins 26 ára Aleksandrs Cauņa sem leikur með rússneska stórliðinu CSKA Moskvu.

„Allt eru þetta mikilvægir leikmenn í landsliðinu en fjarvera Cauņa er hvað erfiðust fyrir liðið. Hann hefur verið í miklu basli undanfarið ár vegna ökklameiðsla en Cauņa er okkar teknískasti leikmaður og er leiðtogi á miðjunni.“

Þess fyrir utan eru margir í hópnum hjá Lettlandi sem hafa lítið sem ekkert spilað að undanförnu. Tveir eru án félags sem stendur, þar af fyrirliðinn Kaspars Gorkšs sem hefur leikið með Blackpool, QPR og nú síðast Reading í Englandi.

„Hann spilaði síðast með félagsliði í apríl. En hann var góður í leikjunum í Baltic Cup í maí og var líka fínn gegn Kasökum. Ég hef því ekki miklar áhyggjur af honum.“

Aleksandrs Fertovs er einnig án félags en hann hefur að sögn Ilvars dvalið í Póllandi síðustu vikurnar og er nálægt því að landa samningi við úrvalsdeildarlið þar í landi.

„Artjoms Rudņevs hefur lítið spilað með Hamburg í þýsku úrvalsdeildinni og hið sama má segja um Valērijs Šabala hjá Anorthosis Famagusta á Kýpur. Hann kemur aðallega við sögu sem varamaður þar.“

Þess má geta að Šabala er aðeins nítján ára gamall og yngsti markaskorari Lettlands frá upphafi.

„Það eru því fyrst og fremst leikmennirnir sem spila heima í Lettlandi sem eru í bestu leikæfingunni. En það eru líka leikmenn sem vilja sýna og sanna sig fyrir landsliðsþjálfaranum og ég á von á því að þeir verði öflugir á föstudaginn.“

Helsta afrek Lettlands var að komast á EM 2004 í Portúgal en Ilvars segir að það sé mikill munur á liðinu nú og þá.

„Vissulega hefur oft verið betri stemning í kringum liðið. Fyrir tíu árum síðan vorum við með marga góða leikmenn sem léku með stórum liðum í Englandi og Rússlandi. En það er ekki svo nú og útlit fyrir að þessi kynslóð knattspyrnumanna sé einfaldlega ekki jafn sterk og síðasta.“