Sjáðu ævintýralega björgun Hannesar

Eins og frá var greint fyrr í kvöld vann Sandnes Ulf langþráðan sigur í norsku úrvalsdeildinni í fótbolta í kvöld. Vålerenga var mótherjinn, en Viðar Örn Kjartansson langmarkahæsti leikmaður deildarinnar er í þeirra röðum.

Hann komst þó ekki á blað í leiknum. Landar hans Eiður Aron Sigurbjörnsson og nafnarnir Hannes Þór Halldórsson og Sigurðsson spiluðu allan leikinn fyrir Sandnes sem er, þrátt fyrir sigurinn, enn í botnsæti deildarinnar.

Sá síðastnefndi átti risastóran þátt í að Sandnes fékk öll stigin þrjú, en Hannes bjargaði með ótrúlegum hætti á línu í stöðunni 2-1 fyrir Úlfana.

Aðeins ein mínúta var eftir af leiknum þegar Viðar vippaði boltanum yfir Hannes Þór. Svo virtist sem Viðari hefði tekist að skora sitt 25. mark í deildinni, en framherjinn Hannes sýndi ótrúleg viðbrögð og hreinsaði boltann frá með bakfallsspyrnu rétt áður en hann fór yfir marklínuna.

Myndband af atvikinu ótrúlega má sjá á vef norska dagblaðsins Verdens Gang.