Ragnheiður og Þorbergur Íslandsmeistarar

Ragnheiður Kr. Sigurðardóttir úr Gróttu og Þorbergur Guðmundsson KFA urðu í dag stigameistarar á Íslandsmeistaramóti í réttstöðulyftu í Kópavogi.

Ragnheiður háði harða baráttu við félaga sinn í Gróttu, Tinnu Rut Traustadóttur. Ragnheiður tryggði sér sigur með því að lyfta 160 kg í -57 kg flokki og fékk fyrir það 195,4 stig. Enginn fékk fleiri stig fyrir lyftu í dag.

Þorbergur Guðmundsson lyfti 340 kg í +120 kg flokki unglinga og fékk 190,026 stig fyrir. Keppnin var tvísýn framan af eða allt þar til Þorbergur steig á svið í sinni síðustu lyftu.

KFA frá Akureyri var stigahæsta liðið en liðakeppnin var sameiginleg stigakeppni í karla- og kvennaflokki.