„Málið stendur þannig að það er framhaldsaðalfundur á föstudaginn,“ segir Reynir Traustason, ritstjóri DV. Reynir var í viðtali hjá Harmageddon á X-inu í morgun.
Aðalfundi DV ehf. var frestað um eina viku á föstudaginn síðastliðinn þegar í ljós kom að ársreikningur félagsins hafði ekki legið fyrir í fimm daga eins og lög gera ráð fyrir.
Starfsmenn DV ehf. hafa að undanförnu lýst yfir áhyggjum vegna væringa um eignarhald félagsins og lýsa því sem tilraun til fjandsamlegrar yfirtöku þar sem ekki liggi ljóst fyrir hvaða aðilar það eru sem fjármagni kaupin.
Laugar ehf. hafa keypt 4,42 prósent hlut í DV ehf. en Laugar eru í eigu Björns Leifssonar oft kenndur við World Class.
„Ég veit að Björn Leifsson hefur sagt að tilgangurinn með því að kaupa hlut í DV sé eingöngu til þess að koma mér frá. Síðan ætli hann sér að reyna selja aftur sinn hlut,“ sagði Reynir.
Reynir hefur áður viðurkennt að Guðmundur Kristjánsson útgerðarmaður í Brimi hafi lánað sér persónulega fé til þess að kaupa hlutafé í DV. Hefur lánið vakið upp spurningar um hlutleysi fjölmiðilsins í umfjöllun sinni um Guðmund.
„Það er rétt að félag í eigu Guðmundar lánaði mér til kaupa á hlutafé rétt eins og Gísli Guðmundsson, kenndur við B&L, veitti slíkt lán sem síðan fór inn í einkahlutafélagið Ólafstún,‟ sagði Reynir á Fésbókarsíðu sinni á dögunum.
„Ég hef ekki leynt neinu og er þetta allt til í skattaskýrslu minni eins og öll mín lán. Ég hef aftur á móti bara fjallað um mál með allskyns hætti. Stundum erum við að lofa menn og stundum erum við lasta þá. Guðmundur Kristjánsson hefur svo sannarlega fengið á baukinn í DV. Við skulum hafa þá á hreinu að Sigurður G. Guðjónsson og félagar eru í blóðugri herferð gegn mér og ætla sér að rústa mér fjárhagslega,“ sagði Reynir í Harmageddon í morgun.
DV hefur mikið fjallað um lekamálið svokallaða en málið varðar minnisblað sem lekið var úr innanríkisráðuneytinu um málefni hælisleitandans Tony Omos í nóvember í fyrra. Reynir segir DV standa vel.
„Félagið stendur vel efnahagslega og á mikla lífsmöguleika en þá eru líka ljótu karlarnir komnir á kreik um leið. Þá segjast þeir vilja reka mig, og fyrir hvern andskotann? Ég bara veit það ekki, líklega fyrir það að ég hef verið eitthvað óþekkur í stjórninni og ekki viljað að stjórnarformaðurinn komist upp með hvað sem er. Ég held að þeir hafi ekki mikið við mitt starf að athuga nema einhver skrif um Framsóknarflokkinn og lekamálið.“
Lyon
Manchester Utd
