Götuhjólakeppni í fallegu umhverfi Þingvallavatns

Hjólakeppnin RB Classic verður ræst við ION hotel á sunnudaginn klukkan níu. Hjólað verður réttsælis umhverfis Þingvallavatn en leiðin liggur um ægifagra náttúru Þingvalla og nágrennis. Keppt verður í tveimur vegalengdum,  127 kílómetrar, sem eru tveir hringir í kringum vatnið og svo 65 kílómetrar sem er einn hringur.

“Þetta verður öðruvísi götuhjólakeppni að því leyti að tíu kílómetra kafli er á möl sem gerir keppnina þeim mun áhugaverðari. Einnig verður keppnin í lengra lagi en tíðkast hefur á Íslandi,” segir  Óskar Ómarsson, formaður Tinds hjólreiðafélags.

„Það hefur ekki verið algengt að hafa götuhjólakeppni á þessu undirlagi hér á landi en það er algengt erlendis. Þetta er tilraun hjá okkur til að búa til aðeins öðruvísi hjólakeppni hérna heima en eitt af yfirlýstum markmiðum Tinds er að auka fjölbreytni í hjólaíþróttinni og útvíkka hana.“

Óskar segir það mikilvægt að hafa styrktaraðila eins og RB á bak við sig en hingað til hafa hjólreiðafélögin staðið meira og minna ein í keppnishaldinu. „Hjólreiðafélög hér á landi hafa yfirleitt verið rekin á núlli og því erfitt að fjármagna greinina og vera með ungliðastarf og fleira. Í sumar hefur stefnan verið sú að hafa öll mót í samstarfi við styrktaraðila og það hefur gengið vel.“

Friðrik Þór Snorrason, forstjóri RB segir það vera af samfélagslegri ábyrgð sem þeir styrki keppnina. „Við höfum verið að ýta undir það að starfsmenn okkar tileinki sér vistvænar samgöngur. Hjólreiðar hafa líka verið að aukast og fengið meðbyr og við viljum taka þátt í því að efla heilsu almennings. Þetta er, að mér vitandi, í fyrsta sinn sem peningaverðlaun eru í boði í svona móti þó þau séu meira táknræn í þetta skipti en eitthvað annað. Okkar væntingar eru að þetta verði árlegur viðburður sem við munum halda áfram að styrkja. Við skynjum mikla stemmingu fyrir keppninni og ég hlakka mikið til sunnudagsins.“