Jafntefli í síðasta æfingaleik Inter

Inter lék síðasta æfingaleik sinn fyrir leikina gegn Stjörnunni í kvöld í 0-0 jafntefli gegn gríska liðinu PAOK.

Inter tapaði nokkuð óvænt fyrir Eintracht Frankfurt 1-3 á dögunum en liðið tók einnig þátt í International Champions Cup í Bandaríkjunum.

Allar helstu stjörnur liðsins voru með Inter í leiknum en liðinu tókst ekki að koma boltanum framhjá Panagiotis Glykos í marki PAOK.

Inter kemur til landsins á næstu dögum en gríðarleg eftirvænting er fyrir leik liðsins gegn Stjörnunni. Myndaðist biðröð fyrir utan Laugardalsvöll í dag þegar ársmiðahafar gátu keypt miða en talið er að allir 9800 miðarnir á leikinn seljist á næstu dögum.