París norðursins slær í gegn

Kvikmyndin París norðursins eftir Hafstein Gunnar Sigurðsson fær frábæra dóma eftir heimsfrumsýningu á alþjóðlegri kvikmyndahátíð í Tékklandi í gær. Gagnrýnandi telur myndina líklega til að hljóta aðalverðlaun hátíðarinnar.

París Norðursins var heimsfrumsýnd á kvikmyndahátíðinni á Karlovy Vary í Tékklandi í gærkvöldi, en hátíðin er sögð vera virtasta kvikmyndahátíðin í austur Evrópu.  Hún var sett síðast liðinn föstudag og lýkur á laugardaginn.

Gagnrýnandi kvikmyndavefsins Screen Daily lýsir mikilli hrifningu á þessarri annarri kvikmynd leikstjórans Hafsteins Gunnars Sigurðssonar í fullri lengd.  Hafsteinn Gunnar er sagður vera einn af bestu leikstjórum í nýliðadeild samtímans í Evrópu og mynd hans sé afhjúpandi, skemmtileg og vitsmunaleg. Hafsteinn Gunnar er ánægður með viðtökurnar.

„Já, ég er bara mjög glaður. Þetta var í fyrsta skipti sem við sýndum fólki myndina í gær. Pakkfult í tólfhundruð manna sal og rosa góð stemming. Þannig að það var mjög ánægjulegt að upplifa það,“ segir Hafsteinn Gunnar.

Myndin er sögð lýsa vel sambandi karlmanna eins og fyrri kvikmynd Hafsteins Gunnars í fullri lengd, Á annan veg. Hún var nýlega endurgerð í Bandaríkjunum undir nafninu Prince Avalance með Paul Rudd, einum aðalleikara Anchorman myndanna og  Emile Hirsch í aðalhlutverkum.

Áttu von á að þessi verði endurgerð eins og hin?

„Það er aldrei að vita,“ segir Hafsteinn Gunnar og hlær. „Hver veit, maður veit aldrei. Þetta er alltaf svaka lottó og maður veit aldrei hvað gerist,“ bætir hann við.

Gagnrýnandi Screen Daily er svo hrifinn að myndinni að hann segir að hún hljóti að koma til greina sem aðalverðlaunamynd hátíðarinnar, gerir þú þér vonir um það?

„Ég veit það ekki. Það er eins og ég segi, þetta er alltaf lottó. Það er fimm manneskjur (í dómnefnd) sem eru kannski ósamála. En ég er mjög ánægður með myndina og er stoltur af henni. Það er gaman að fólk er einmitt að upplifa hana eins og maður vonaði. Þannig að ég vona að dómnefndin geri slíkt hið sama,“ segir Hafsteinn Gunnar.

París norðursins fjallar um samband kennarans Huga í smáþorpi á Vestfjörðum, sem Björn Thors leikur, við drykkfelddan föður sinn, sem Helgi Björnsson leikur. En faðirinn ruglar annars reglusamt lífi sonarins með komu sinni í þorpið. Hafsteinn Gunnar segir ekki ákveðið hvenær myndin verði frumsýnd á Íslandi.

„Hún er svona að byrja að eiga sér líf á hátíðunum og við erum byrjaðir að fá töluvert af boðum í kjölfarið á þessari hátíð. Þannig að ég myndi segja einhvern tíma með haustinu,“ segir Hafsteinn Gunnar Sigurðsson kvikmyndaleikstjóri.

Myndin fær einnig jákvæða umfjöllun í Hollywood Reporter.