Miami Heat valdi uppáhaldið hans LeBron James

LeBron James ætti að vera ánægður með framgöngu Miami Heat í nýliðavali NBA-deildarinnar í gær en þá valdi félagið uppáhaldsháskólaleikmanninn hans í nýliðavalinu.

Miami Heat gerir nú allt til þess að sannfæra LeBron James um að vera áfram hjá liðinu en félagið þurfti að skipta á valréttum til að geta valið Shabazz Napier númer 24.

Shabazz Napier er kokhraustur leikstjórnandi sem varð tvisvar sinnum bandarískur háskólameistari með Connecticut-háskólanum, fyrst í minna hlutverkið árið 2011 og svo aftur í vor sem aðalleiðtogi liðsins.

LeBron James hefur ítrekað lýst yfir hrifningu sinni á Shabazz Napier sem hann talað um sem besta leikstjórnandann í nýliðavalinu í ár. Strax eftir valið skellti hann sér á twitter og skrifaði: „Uppáhaldsleikmaðurinn minn í þessu nýliðavali. #Napier"

Miami Heat átti valrétt númer 26 en skipti við Charlotte Hornets til þess að komast upp í sæti 24. Heat-liðið gaf eftir tvo valrétti í annarri umferð.

Shabazz Napier sagði í viðtali eftir að fréttirnar bárust af skiptunum að hann vonaðist til þess að koma hans myndi hjálpa til við að sannfæra LeBron James um að spila áfram með Miami Heat.

Shabazz Napier var með 18,0 stig, 5,8 fráköst og 4,9 stoðsendingar að meðaltali á lokaári sínu með University of Connecticut og hann var valinn besti leikmaður úrslitaleiksins þegar UConn vann 60-54 sigur á Kentucky. 

My favorite player in the draft! #Napier

— LeBron James (@KingJames) June 27, 2014