Markvörður Bayern München kemur í stað Þóru

Þóra Björg Helgadóttir er á heimleið í sumar eins og áður hefur komið fram en lið hennar Rosengård hefur fundið eftirmann íslenska landsliðsmarkvarðarins.

Kathrin Längert, 27 ára markvörður Bayern München, mun leysa Þóru af í marki Rosengård en Längert kemur til sænska liðsins í lok júní þegar Þóra flytur til Íslands.

Kathrin Längert hefur varið mark Bayern München frá 2009 og hefur verið í hóp hjá þýska landsliðinu þótt hún eigi enn eftir að spila sinn fyrsta A-landsleik.

„Ég er mjög ánægð með þetta. Mig hefur alltaf dreymt um að spila erlendis og það mikill heiður fyrir mig að fá nú að spila með einu besta liði Evrópu," er haft eftir Kathrin Längert í fréttatilkynningu frá Rosengård.

Bayern München er í fjórða sæti þýsku deildarinnar á eftir risunum FFC Frankfurt, Turbine Potsdam og Wolfsburg.