Avaldsnes tapaði sínum fyrsta leik

Íslendingaliðið Avaldsnes tapaði sínum fyrsta leik á leiktíðinni í norsku kvennadeildinni í fótbolta í dag þegar liðið lá 3-1 á útivelli á móti Röa.

Avaldsnes var búið að vinna tvo fyrstu leiki sína 3-0 en réð ekkert við hina átján ára gömlu Synne Skinnes Hansen sem skoraði þrennu fyrir Röa í þessum leik.

Þórunn Helga Jónsdóttir spilaði allan leikinn fyrir Avaldsnes en Hólmfríður Magnúsdóttir kom inná sem varamaður strax á 5. mínútu. Hólmfríður var síðan tekin af velli á 66. mínútu.

Hin brasilíska Debora Cristiane de Oliveira skoraði mark Avaldsnes á 50. mínútu en hún minnkaði þá muninn í 2-1. Hansen var hinsvegar aðeins sex mínútur að koma Röa aftur í tveggja marka forystu.