Breytingar hjá McLaren-liðinu

McLaren hefur sett af stað áætlun til komast aftur í toppbaráttuna í Formúlu 1. Áætlunin felst einna helst í mannabreytingum og vegur þar þyngst ráðning á tveimur loftflæðisérfræðingum. Tony Salter kemur frá Sauber og Guillaume Cattelani frá Lotus.

Eftir að báðir bílar náðu verðlaunasæti í Ástralíu hefur McLaren ekki náð í stig í tvemur síðustu keppnum.



Breytingar verða einnig gerðar á starfsemi liðsins. Skipanir verða beinni og skýrari og samskipti innan liðsins verða einfölduð.

Sett verða nákvæm markmið fyrir þróun bílsins í hverri deild. Þá mun ábyrgð tæknistjórans Tim Goss og yfirverkfræðingsins Matt Morris aukast til muna.



Eric Boullier, keppnisstjóri McLaren er sannfærður um að þessar innanbúða breytingar muni gera gæfumuninn.

„Ég held að þetta stuðli að því að sama fólkið sé að vinna að sameiginlegu marki undir öflugum leiðtoga, góðri leiðsögn og að lágmarki mun það hjálpa þeim að ná aftur fyrri árangri,“ sagði Boullier.

„Við teljum að við munun sjá hag af þessu þegar líður á tímabilið, en hiklaust á næsta ári,“ sagði Boullier.

Nú hafa stóru liðin hafið grunnvinnu við þróun bílanna fyrir næsta tímabil. McLaren ætlar greinilega ekki að láta koma að tómum kofanum hjá sér árið 2015.