J.B. Holmes skaust í efsta sæti á Wells Fargo fyrir lokahringinn

Bandaríkjamaðurinn J.B. Holmes skaust upp í forystusætið á Wells Fargo meistaramótinu á þriðja hring sem kláraðist í gær en hann er á 13 höggum undir pari eftir fyrstu þrjá hringina. Í öðru sæti kemur landi hans Martin Flores á 12 höggum undir pari en Phil Mickelson er einn í þriðja sæti á 11 höggum undir. Mickelson átti slakan annan hring í mótinu og lék á 75 höggum eða þremur yfir pari. Hann bætti sig hins vegar um 12 högg á milli hringja og lék á 63 höggum í gær, níu undir pari og er í hörkubaráttu um sigurinn fyrir lokahringinn.

Rory McIlroy spilaði einnig frábært golf á Quail Hollow í gær eftir lélegt gengi á öðrum hring en hann kom inn á 65 höggum, sjö undir pari og er samtals á sex höggum undir pari fyrir lokahringinn.

J.B. Holmes á marga aðdáendur en þessi 32 ára kylfingur er í hópi högglengri manna á PGA-mótaröðinni. Hann hefur unnið tvö mót á henni, árið 2006 og 2008 en síðan hann fór í heilaskurðaðgerð árið 2011 hefur honum ekki tekist að landa sigri. Áhugavert verður að sjá hvernig hann höndlar pressuna á lokahringnum í kvöld sem verður í beinni útsendingu á Golfstöðinni frá klukkan 17:00.