Jakkaföt fyrir skrifstofufólk á hjólum

Helsta kvörtunaratriði þeirra sem kjósa að hjóla í vinnuna er að þurfa að skipta um föt er komið er í vinnuna. Það er kannski úr sögunni, minnsta kosti á bjartari og heitari dögum því jakkafataframeiðandinn Parker Dusseau í San Francisco framleiðir nú jakkaföt sérhönnuð fyrir hjólreiðar.

Þessi föt eru úr mjög teygjanlegu efni sem er blanda af Merino ull og teygjanlegu gerviefni. Buxurnar eru með þægilegri hjólabót í klofinu og vel er passað uppá það að saumar snerti hvergi hörund vegna hættu á núningssárum. Í mittinu er tvöföld gúmmiteygja sem heldur skyrtunni ofan í buxunum.

Buxunum má rúlla upp að neðan og festa með þar til gerðri tölu án þess að krumpast, en hjólreiðamenn vilja ógjarnan festa buxur sínar í keðjunni. Í jakkanum eru teygjanlegir renningar sem hefta hjólreiðamenn ekki er þeir halla sér fram á stýrið, efni jakkans einfaldlega gefur eftir og teygist.

Ytra byrði skyrtukragans og innra birði ermanna eru með endurskyni og því þarf aðeins að bretta uppá til að sjást betur í myrkri. Einnig er endurskyn innan í vösunum og þarf þá aðeins að bretta þá út og þegar þeir flagsa um í vindi verða þeir enn meira áberandi.

Allt þetta fínerí kostar auðvitað skildinginn, eða um 730 dollara, sem útleggst á um 82.000 krónur. Mörg jakkaföt eru reyndar miklu dýrari en þessi.