Koke afgreiddi Barcelona | Sjáðu markið

Barcelona er úr leik í Meistaradeild Evrópu eftir 1-0 tap gegn Atletico Madrid í kvöld. Fyrri leik liðanna lyktaði með 1-1 jafntefli.

Það var Koke sem kom heimamönnum yfir strax á 5. mínútu. Eftir þunga sókn heimamanna kom Koke boltanum yfir línuna af stuttu færi. Frábær byrjun hjá þeim.

Atletico sótti nær linnulaust áfram og það var hreinlega með ólíkindum að liðið skildi ekki bæta við marki.

Fyrri hálfleikur var stórkostleg skemmtunum og Barcelona mátti þakka fyrir að vera aðeins marki undir í leikhléi.

Mikið fjör var einnig í síðari hálfleik en sem fyrr gekk liðunum illa að koma tuðrunni yfir línuna. Eftir því sem leið á hálfleikinn datt lið Atletico aftar á völlinn og varðist með kjafti og klóm. Þeir fengu samt frábær færi til að skora rétt eins og Barcelona.

Ekki kom markið og Atletico komst í undanúrslit og fagnaði því hreint ógurlega í leikslok.

Koke skorar fyrir Atletico Madrid.