Myndir af blóðugum Pistoriusi sýndar í réttarsal

Ljósmyndir af blóðugum Oscari Pistorius voru sýndar í réttarsal í Pretoríu í morgun þar sem réttarhöld fara fram yfir honum vegna morðákæru. Myndirnar voru teknar skömmu eftir að lögreglumenn komu á vettvang en Pistorius skaut kærustu sína, Reevu Steenkamp, til bana í febrúar í fyrra.

Fram kom í gær að baðherbergishurð Pistoriusar hefði verið tekin í sundur, sett í líkpoka, og geymd á skrifstofu lögreglumannsins Schoombie van Rensburg, sem nú hefur hætt störfum. Hurðin var sögð hafa staðið upp við skrifborð hans svo dögum skipti en Rensburg fullyrðir að ekkert hafi verið átt við hurðina.

Rensburg sagði að baðherbergisdyrnar hefðu verið læstar þegar lögreglumenn bar að garði, en Pistorius skaut Steenkamp í gegnum hurðina. Á annarri ljósmynd mátti sjá lykilinn að baðherberginu í skráargatinu að utanverðu, en það rímar við frásögn Pistoriusar sem segist hafa brotið hurðina til þess að ná lyklinum úr skráargatinu að innanverðu og opna. Þá mátti sjá loftriffil og hafnaboltakylfu við inngang baðherbergisins á enn einni mynd.

Pistorius segist hafa haldið að Steenkamp væri innbrotsþjófur þegar hann skaut hana en hann á yfir höfðu sér lífstíðarfangelsi verði hann sakfelldur. Mun hann þurfa að sitja inni í að minnsta kosti 25 ár, en hann er einnig ákærður fyrir að hafa ólögleg skotvopn í fórum sínum og gæti fengið fimm ár að auki fyrir hvert vopn.