Íslenska skíðafólkið skilaði sér í mark í Sotsjí

Íslenska alpagreinafólkið á Vetrarólympíuleikum í Sotsjí komst í mark í átta af níu greinum sínum sem er miklu betra hlutfall en á undanförnum leikum. Fréttablaðið bar þennan árangur saman við hlutfall keppenda sem komust í mark á síðustu fjórum Vetrarólympíuleikum.

Í heildina var árangur aðeins undir þeim markmiðum sem ég hafði sett mér,“ sagði Fjalar Úlfarsson, landsliðsþjálfari Íslands í alpagreinum, um frammistöðu íslenska hópsins á Vetrarólympíuleikunum í Sotsjí.

„Stelpurnar náðu þó að klára allar greinar sem þær tóku þátt í og það er langt síðan það hefur gerst á ÓL. Okkar fólk skortir samt meiri reynslu í keppni í erfiðum aðstæðum, en aðstæður voru erfiðar bæði hjá körlum og konum í svigi og stórsvigi,“ sagði Fjalar.

„Þessir krakkar hafa mikið sjálfstraust, þau langaði mikið til að sjá hvar þau standa og þau börðust fyrir því að skila sér í mark í stað þess að fara út úr brautinni við minnstu mistök. Til þess að ná þeim markmiðum sem keppendur settu sér þarf að taka áhættu og það er ekki hægt að skíða niður bara til að klára. Það var ekki sérstaklega lagt upp með að bara klára. Við erum með mjög ungt landslið þessa stundina og allir á sínum fyrstu leikum. Ég sé fyrir mér að hluti af þessum hópi verði á næstu leikum, þá fjórum árum eldri og reynslunni ríkari,“ sagði Fjalar að lokum.

Hér fyrir neðan má sjá hlutfall íslenska alpagreinafólksins sem komst í mark í sínum greinum á síðustu fimm Vetrarólympíuleikum

Íslenska skíðafólkið skilaði sér í mark í Sotsjí

8 prósent

1 af 12

ÓL í Naganó 1998

42 prósent

5 af 12

ÓL í Salt Lake City 2002

67 prósent

8 af 12

ÓL í Torinó 2006

29 prósent

2 af 7

ÓL í Vancouver 2010

90 prósent

8 af 9

ÓL í Sotsjí 2014



Árangur íslensku keppendanna í Sotsjí:

29. sæti í risasvigi - Helga María Vilhjálmsdóttir

34. sæti í svigi - Helga María Vilhjálmsdóttir

36. sæti í svigi - Erla Ásgeirsdóttir

36. sæti í svigi - Brynjar Jökull Guðmundsson

46. sæti í stórsvigi - Helga María Vilhjálmsdóttir

54. sæti í stórsvigi - Erla Ásgeirsdóttir

54. sæti í stórsvigi - Einar Kristinn Kristgeirsson

59. sæti í stórsvigi - Brynjar Jökull Guðmundsson

Úr leik í svigi - Einar Kristinn Kristgeirsson