Hafdís setti glæsilegt Íslandsmet í langstökki

Hafdís Sigurðardóttir setti nýtt og glæsilegt Íslandsmet í langstökki á Innanhússmeistaramóti Íslands í frjálsum íþróttum sem stendur nú yfir í Frjálsíþróttahöllinni í Laugardal.

Hafdís bætti gamla metið um heila tólf sentímetra sem er mjög mikil bæting.

Hafdís stökk 6,40 metra og bætti rétt tæplega ellefu ára gamalt Íslandsmet Sunnu Gestsdóttur sem stökk 6,28 metra 8. febrúar 2003. Sunna var fyrsta konan sem stökk yfir sex metra innanhúss.

Hafdís Sigurðardóttir á nú bæði langstökksmetin en hún tók Íslandsmetið utanhúss af Sunnu síðasta sumar þegar hún stökk 6,36 metra.

Stökkið í dag var því lengra en núgildandi Íslandsmet utanhúss og hefur því íslensk kona aldrei stokkið lengra.