Upptökudagur hjá Lotus

Nýi bíll Lotus-liðsins ók um brautina í Jerez í dag. Tímasetningin vekur athygli vegna þess að æfingar hefjast ekki aftur fyrr en 19. febrúar og þá í Bahrein.

Lotus kallar þennan dag auglýsingaupptöku dag. Þrátt fyrir að heita upptökudagur er líklegt að liðið noti leyfða vegalengd til hefðbundinna æfinga. Liðin mega öll nota tvo daga utan skipulagðra æfinga til að aka allt að 100 kílómetra í auglýsingaskyni. Annars gildir algjört bann við akstri bílanna sjálfra.

Lotus-liðið valdi að sleppa fyrstu æfingunum sem lauk fyrir viku. Dagurinn í dag var því frumraun Lotus E-22 bílsins. Um borð er Renault-vél líkt og í bíl Red Bull. Vélin frá Renault olli miklum vonbrigðum á æfingum síðustu viku. Red Bull ók aðeins 21 hring um brautina meðan Mercedes ók 309 hringi og Ferrari 251 hring.

Trjónan á framenda bílsins er einstök. Henni hefur verið líkt við fílabein, en hún skiptist í tvennt. Mislangir endar trjónunnar eru það sem vekur mesta athygli. Lengri endinn flokkast sem raunverulegur framendi og sá styttri sem hluti af yfirbyggingu bílsins. Þannig tekst Lotus að teygja sig inn fyrir gildi reglna um útlit framenda bílanna.