Hálka víða um land

Hálkublettir eru á  Mosfellsheiði og einnig á nokkrum leiðum  í uppsveitum Suðurlands. Flughált er í Kjósarskarði. Þetta kemur fram í tilkynningu frá Vegagerðinni.

Hálka eða hálkublettir eru víða á Vesturlandi. Á Vestfjörðum er hálka eða hálkublettir á flestum vegum en snjóþekja er yst í Djúpinu og á Steingrímsfjarðarheiði. Þæfingsfærð á Þröskuldum, Klettshálsi og frá Bjarnafirði og í Reykjafjörð á Ströndum.

Hálka eða hálkublettir eru á flestum vegum á Norðurlandi vestra en hálka og snjóþekja á Norðausturlandi.

Á Austurlandi er snjóþekja, hálka eða hálkublettir á vegum. Greiðfært er síðan frá Djúpavogi og áfram með suðausturströndinni.

Vegna vinnu við einbreiða brú á Hringveginum við Súlu/Núpsvötn á Skeiðarársandi má búast við umferðartöfum þar allt að 30 mínútur í senn á milli klukkan 8 og 19 fram á fimmtudag.