Enn óvissa með Arnór

Þó svo Arnór Atlason sé ekki lengur í sextán manna hópi Íslands á EM þá er ekki loku fyrir það skotið að hann muni koma aftur inn í hópinn.

Arnór er enn með liðinu í Herning og er í stífri meðferð hjá sjúkraþjálfurum íslenska liðsins. Hann eyðir mestum tíma á æfingum þó á þrekhjólinu.

Hann lét aðeins reyna á meiðslin á æfingunni í dag en er augljóslega ekki orðinn nógu góður. Það er því frekar hæpið að hann geti spilað gegn Makedóníu á morgun.

Ísland á svo leik gegn Dönum á miðvikudag og ef liðinu gengur áfram vel þá á það einnig leik á föstudag. Aron Kristjánsson landsliðsþjálfari hefur notað tvær leikmannaskiptingar á mótinu og á eina inni.