Aron: Þessi meiðsli ógna ferli Alexanders

"Hann getur ekki verið með vegna meiðsla. Hann segist ekki þola álagið sem fylgi því að spila á stórmóti miðað við standið á honum í dag," segir Aron Kristjánsson, landsliðsþjálfari í handbolta, um Alexander Petersson en hann tilkynnti í dag að hann myndi ekki spila með landsliðinu á EM í janúar.

Alexander hefur verið að glíma við þrálát meiðsli í öxl í lengri tíma og missti af HM fyrir um ári síðan vegna sömu meiðsla. Þá ætlaði hann sér að koma sterkari að ári en það gekk ekki eftir.

"Hann spilar með liðinu en æfir lítið. Hann hefur til að mynda ekkert æft síðan hann spilaði um helgina."

Alexander getur spilað með liði sínu Löwen en treystir sér ekki í þau átök sem fylgja stórmóti. Var ekkert rætt að hann kæmi með og reyndi að hjálpa til eins og hann gæti?

"Við ræddum um þann möguleika en hann vildi annað hvort vera með á fullu eða ekki," segir Aron en er hann sáttur við þessa niðurstöðu?

"Hann er að glíma við erfið meiðsli sem ógna hans ferli. Þetta er orðið langt ferli hjá honum og spurning hvort það hefði ekki mátt gera þetta öðruvísi? Manni hefur stundum fundist hann vera að spila mikið miðað við stöðuna á sér. Sérstaklega í fyrra. Þetta er samt alltaf ákvarðanataka og erfitt að segja hvort hlutirnir hefðu verið öðruvísi ef þetta hefði verið gert á annan hátt. Það sem þó hefur verið gert virðist ekki vera að skila tilætluðum árangri enda hefur hann verið að glíma við þessi meiðsli lengi."

Þá standa eftir í vinstri skyttustöðunni þeir Rúnar Kárason og Ásgeir Örn Hallgrímsson. Þeir þurfa að fylla stórt skarð sem Alexander skilur eftir sig.

"Þetta er mikið áfall fyrir okkur og segir líka ýmislegt um hans alvarlegu stöðu. Hann er að berjast fyrir sínum ferli."