Jafntefli í fyrsta leik Óla Stef

ÍR og Valur skildu jöfn 29-29 í Reykjavíkurmótinu í kvöld. Geir Guðmundsson fór á kostum í liði Vals.

Valsmenn, sem Ólafur Stefánsson þjálfar, höfðu yfirhöndina í fyrri hálfleik og leiddu að honum loknum 16-12. Heimamenn í Seljaskóla tóku við sér í síðari hálfleik og lauk leiknum með jafntefli.

Sturla Ásgeirsson skoraði átta mörk fyrir heimamenn og nýr liðsmaður ÍR-inga, Arnar Birkir Hálfdánarson, sjö. Geir Guðmundsson, sem gekk í raðir Vals frá Akureyri í sumar, skoraði níu mörk fyrir Val en Alexander Örn Júlíusson kom næstur með fimm mörk.