Fríða skoraði eitt af fjórum

Hólmfríður Magnúsdóttir var á skotskónum með Avaldsnes í 4-1 útisigri á Amazon Grimstad í norsku úrvalsdeildinni í knattspyrnu í dag.

Gestirnir lentu undir strax á 5. mínútu en jöfnuðu eftir hálftíma leik. Jafnt var í hálfleik 1-1 og enn var jafnt þegar tíu mínútur lifðu leiks.

Hólmfríður kom Avaldsnes yfir á 80. mínútu og tvö mörk gestanna fylgdu í kjölfarið. Markvörðurinn Guðbjörg Gunnarsdóttir, Mist Edvarsdóttir og Þórunn Helga Jónsdóttir leika einnig með Avaldsnes. Avaldsnes er í 8. sæti deildarinnar af tólf liðum eftir tíu umferðir.

Fanndís Friðriksdóttir og félagar í Kolbotn máttu sætta sig við 2-0 tap á útivelli gegn toppliði Lilleström. Arna-Björnar, lið Gunnhildar Yrsu Jónsdóttur, vann góðan 2-0 heimasigur á Vålerenga. Íslenski miðjumaðurinn sleit krossbönd í júní og er frá keppni.