Rétt hjá mér að hvíla

Derrick Rose, stjarna Chicago Bulls, var talsvert gagnrýndur síðasta vetur fyrir að koma ekki inn í liðið þó svo hann væri búinn að jafna sig af krossbandaslitum.

Rose stóð fastur á sínu, sagðist þurfa meiri hvíld svo hann gæti komið inn af alvöru krafti næsta vetur.

"Ég er ekki eigingjarn maður. Að fara í gegnum þennan meiðslapakka og vera skynsamur, það kallaði á að ég þurfti að vera aðeins sjálfselskur. Ég gat ekki hugsað um neitt annað en sjálfan mig og meiðslin," sagði Rose.

Leikmaðurinn segir að þeir stuðningsmenn sem hafi gagnrýnt hann muni sjá næsta vetur að hann hafi tekið rétta ákvörðun með að hvíla.

"Þegar þeir sjá mig á vellinum næsta vetur munu þeir ekki efast um að ég tók rétta ákvörðun."

Rose fór í aðgerð vegna meiðslanna fyrir 14 mánuðum síðan.