Í máli gegn Forbes vegna stöðu sinnar á auðmannalista

Saudi Arabískur prins og milljarðamæringur hefur höfðað mál gegn Forbes tímaritinu í London. Hann sakar tímaritið um að hafa ekki reiknað auðæfi sín rétt út og að hann eigi að vera ofar á árlegum lista Forbes yfir helstu milljarðamæringa heimsins.

Prinsinn sem hér um ræðir, Alwaleed bin Talal, var í 26. sæti á listanum fyrir þetta ár með auðæfin sem metin voru á 20 milljarða dollara. Prinsinn segir að auðæfi sín séu 10 milljörðum dollara meiri og því eigi hann að vera ofar á listanum.

Í frétt um málið í blaðinu Los Angeles Times segir að prinsinn sé æfur af reiði vegna þess hversu neðarlega hann er á þessum lista. Fram kemur í blaðinu að Forbes kunni að hafa gert hann enn reiðari með því að birta grein um hvernig hann metur sjálfur auðæfi sín en þar stendur ekki steinn yfir steini að mati tímaritsins.

„Árum saman hafa fyrrum forstjórar fyrirtækja í eigu Alwaleed sagt mér að prinsinn ýki eigur sínar á kerfisbundinn hátt um milljarða dollara þótt hann sé einn af auðugustu mönnum heimsins,“ skrifaði Kerry Dolan einn af blaðamönnum Forbes í fyrrnefndri grein. Hann bætir því við að jafnvel hinum athyglissjúka Donald Trump hafi aldrei dottið slíkt í hug.

Í frétt Los Angeles Times segir að ef auðæfi prinsins væru metin 10 milljörðum dollara meiri en Forbes gerir myndi það nægja til að hann næði 9. sæti á fyrrgreindum lista.