Íslendingar leggja upp mörk

Gunnar Heiðar Þorvaldsson lagði upp mark Norrköping þegar liðið gerði 1-1 jafntefli á útivelli gegn topplði Malmö í sænsku úrvalsdeildinni í knattspyrnu.

Gunnar lagði upp mark strax á áttundu mínútu leiksins en heimamenn í Malmö jöfnuðu metinn snemma í síðari hálfleik.

Gunnar Heiðar fór meiddur af velli undir lok fyrri hálfleiks en ekki liggur fyrir hve alvarleg meiðsli Eyjamannsins eru.

Norrköping er í 5. sæti með tíu stig en hefur leikið leik meira en flest liðin.

Þá bar Ari Freyr Skúlason fyrirliðabandið hjá Sundsvall þegar liðið lagði Ångelholm 2-0 á útivelli í sænsku b-deildinni. Ari lagði upp fyrra mark gestanna strax á fyrstu mínútu leiksins.

Sundsvall er nú taplaust í þremur leikjum og komið í 5. sæti í deildinni eftir brösuga byrjun.