Bardagakappinn Gunnar Nelson prýðir forsíðu og er í ítarlegu viðtali í Jiu Jitsu Style blaðinu.
Framganga Gunnars í UFC hefur vakið mikla athygli en Gunnar keppti áður í brasilísku jiu jitsu. Fyrirsögnin á forsíðunni er ekki í flóknari kantinum, „Ísmaðurinn" (e. The Iceman), og er meðal annars rætt um frama Gunnars í UFC.
Á heimasíðu bardagafélagsins Mjölnis, þar sem Gunnar æfir og kennir bardagaíþróttir, kemur fram að blaðið sé það stærsta sinnar tegundar í Evrópu.
Gunnar átti að keppa við Mike Pyle í UFC í Las Vegas í lok maí en blása þurfti bardagann af vegna meiðsla hans á hné. Gunnar fór í aðgerð sem gekk vel og er reiknað með því að hann snúi aftur til æfinga innan nokkurra vikna.
