Sannfærður um að við tökum þetta

„Ég hugsa að það sé bara gott fyrir okkur að fá þetta frí. Við erum lúnir menn inni á milli. Þetta hefði mátt vera vika, kannski aðeins of langt, en bara fínt að slípa sig til. Við mætum ferskir til leiks," segir varnartröllið Ægir Hrafn Jónsson.

Ægir var kjörinn besti varnarmaður umferða 15-21 á hófi hjá HSÍ á fimmtudaginn. Hann segir sína menn vera með einbeintinguna í botni og aldrei þessu vant gangi allir leikmenn liðsins heilir til skógar.

„Við höfum verið óvenju heilir eftir áramót sem sést kannski á gengi okkar," segir Ægir Hrafn sem hefur trulla trú á sínum mönnum.

„Ef við náum að haldast nokkuð heilir í gegnum þessa leiki er ég sannfærður um að við tökum þetta. Ég tel okkur vera með betra lið og þetta snýst um það hvort liðið vill sigurinn meira," segir Ægir Hrafn.

Leikur FH og Fram verður í beinni textalýsingu á Vísi en viðureignin hefst klukkan 15.