Ætla ekki að bjóða sameiginlega fram

Píratar, Dögun og Lýðræðisvaktin ætla ekki að bjóða fram sameiginlega til alþingiskosninga 27. apríl næstkomandi. Í tilkynningu segir að stefnur og áherslumál flokkanna séu að sumu leyti misjöfn og rétt þykir að halda sérkennum þeirra, sérstöðu og sjálfstæði til haga.

Töluverður þrýstingur hefur verið á nýju framboðin að mynda með sér bandalag eða sameinast fyrir kosningarnar. Vegna þess að með því margfaldist möguleikarnir á því að þau fái yfir fimm prósenta fylgi, sem þarf til að koma manni inn á þing.

Í tilkynningunni frá framboðunum segir að þau lýsi sig viljug til þess að starfa saman á nýju þingi að sameiginlegum stefnumálum þeirra, nái þau kjöri.