34 stig Durant dugðu ekki gegn Denver

Denver Nuggets vann sinn þrettánda leik í röð í NBA-deildinni í körfubolta í nótt þegar liðið lagði Oklahoma City Thunder 114-104.

Þetta er í þriðja skipti á tímabilinu sem Denver leggur vesturdeildarmeistara síðsta árs. Kevin Durant var samur við sig með 34 stig en þau dugðu ekki fyrir heimaliðið. Ty Lawson skoraði 25 stig fyrir Denver.

Monta Ellis skoraði 21 stig auk þess að taka níu fráköst og eiga átta stoðsendingar í 102-95 útisigri Milwaukee Bucks á Portland Trail Blazers. Gestaliðið leiddi allan leikinn og 28 stig frá Wesley Matthews dugðu ekki Portland til sigurs.

Indiana Pacers fylgdi á eftir þægilegum sigri á Cleveland á mánudaginn með öruggum 95-73 sigri á Orlando Magic í Flórída. Jacque Vaugh, þjálfari Orlando, var rekinn af velli eftir að hafa fengið tvær tæknivillur í síðari hálfleik.

Þá vann Sacramento Kings fimmtán stiga sigur á Los Angeles Clippers í Kaliforníuslag 116-101. Clippers leiddi með fimm stigum fyrir lokafjórðunginn sem heimamenn unnu með tuttugu stiga mun og tryggðu sér sigur.