IKEA kjötbollur aftur til sölu í Danmörku og fleiri Evrópulöndum

Hinar vinsælu IKEA kjötbollur eru aftur til sölu í Danmörku og fleiri Evópulöndum eftir meir en mánaðarhlé í kjölfar hrossakjötshneykslsins sem skók flest Evrópulönd fyrr í vetur.

Í dönskum fjölmiðlum kemur fram að farið var að selja kjötbollurnar í verslunum IKEA í gærdag mörgum viðskiptavinum til ómældrar ánægju.

Tekin hafa verið hundruð sýna úr IKEA bollunum í dönskum vöruhúsum undanfarin mánuð. Ekkert hrossakjöt fannst í þeim en samt ákvað stjórn IKEA að skipta þeim út fyrir nýjar bollur frá Svíþjóð sem byrjað var að selja í gærdag.

IKEA hefur jafnframt fækkað þeim birgjum sem verslunarkeðjan kaupir kjöt frá í Svíþjóð og straumlínulagað framleiðslu- og gæðaeftirlit sitt.

Í frétt um málið á vefsíðu TV2 segir að IKEA sé nú að kanna hvað eigi að gera við gömlu kjötbollubirgðirnar sem hafa sýnt sig að vera jafnhollar og þær nýju. Edvard Moreno veitingastjóri IKEA í Danmörku segir að þeir eigi í viðræðum við yfirvöld um hvernig þeir geti losað sig við þessar kjötbollur á ábyrgan hátt.